Loðnan komin óvanalega langt vestur

Svo virðist sem loðna sé óvenju snemma á ferð undan Suðurströndinni þetta árið ef marka má staðsetningu fjölveiðiskipa á fiskislóðinni. Ekki er vitað hversu mikið magn er um að ræða, en sú loðna sem þarna er virðst vera á hraðri vesturleið.

Um hádegisbilið í dag var loðnan grunnt utan við Holtsós, en síðdegis var hún um hálfa sjómílu austan við höfnina í Bakkafjöru. Samkvæmt þessu hefur hún fært sig um 7-8 mílur til vesturs eða sem svarar 2 sjómílum á klukkustund.

Fjöveiðiskipin Börkur NK, Vilhelm Þorsteinsson EA og Guðmundur VE voru við Holtsós um hádegisbilið, en þegar að var gáð laust eftir klukkan 16 var aðeins hægt að sjá eitt skip, Guðmund VE, skammt austan við Bakkafjöru.

Þegar haft var samband við Guðmund VE kom í ljós að búið er að veiða 250 tonn í dag. Loðnan er stór og falleg með 17 prósent hrognafyllingu. Sem þykir afburðargott.

Að sögn sjómanna þykir þessi loðna vera komin óvanalega langt vestur miðað við árstíma. Um þetta leyti á loðnan að vera að skríða upp á grunnið austur af Stokksnesi, nálægt Hornafirði. Sé tekið mið af frásögn sjómannsins þá er þessi loðnuganga hálfum mánuði fyrr á ferðinni en það sem gengur og gerist að öllu jöfnu.