Arnþór Helgason: Liu Xiaobo talinn ógna hagsmunum heildarinnar

„Það er inngróið í kínverska þjóðarsál að halda þjóðinni saman," segir Arnþór Helgason, formaður Kínversk-íslenska menningarfélagsins og vinuáttusendiherra Kínverja á Íslandi.

Arnþór hefur margsinnis farið til Kína, fyrst á áttunda áratugnum og síðast árið 2004. Kínverjinn Liu Xiaobo hlaut friðarverðlaun Nóbels í vikunni en verðlaunaveitingin hefur beint kastljósi almennings á Vesturlöndum að mannréttindabrotum í Kína.

Arnþór hefur hinsvegar ákveðinn skilning á vibrögðum kínversku kommúnistastjórnarinnar.

„Þegar Liu Xiaobo kom fram með lýðræðiskröfurnar eins og hann gerði þá vildu margir Kínverjar meina að hann ógnaði hagsmunum heildarinnar," segir Arnþór og bendir á að Kínverjar séu almennt á þeirri skoðun að fangelsun Liu sé réttlætanleg.

Arnþór segir nóbelsverðlaunanefndina hafa leikið sér að eldinum með því að veita Liu friðarverðlaun Nóbels.

„Og ég spyr mig hversvegna er hann tilnefndur þegar slíkt gæti leitt til ófremdarástands," segir Arnþór.

Hann bendir á að Kína hafi fengið að fara sínu fram óáreittir hingað til, ef svo má að orði komast. Hann bendir á að velferðakerfi Vesturlanda byggi á því að fá ódýran varning frá Kína.

„Kína er orðið hluti af heimsheildinni sem gerðist ekki fyrr en upp úr 1970," segir Arnþór og bætir við: „Og menn þurfa annaðhvort að taka afleiðingunum eða njóta kosta þess."

Gagnrýni almennings í kína fer vaxandi. En nær undantekningalaust beinist gagnrýnin að sveitarstjórnarstiginu og almenningur virðist treysta því að miðstjórnin grípi til þeirra ráða sem duga, því virðist sem almenningur treysti ríkisstjórninni að sögn Arnþórs.

Arnþór bendir meðal annars á að heilsugæslan á landsbyggðinni hafi verið einkavædd að fyrirmynd Bandaríkjanna. Sú tilraun misheppnaðist hraplega að sögn Arnþórs en hann áréttar að kínversk yfirvöld vinni nú að því að vinda ofan af þeirri þróun.

Arnþór segir það alltaf erfitt að horfa upp á samviskufanga eins og Liu Xiaobo. En hann segir afar lítinn skilning í Kína á því, að hegðun eins manns, sem geti sett ríkiskerfið úr skorðum, sé réttlætanleg.