Fyrst í dag sem ákæruvaldið segir að engin gögn séu til

Ákæruvaldið leynir Níumenningana sem ákærðir eru fyrir árás á Alþingi gögnum, ef marka má Ragnar Aðalsteinsson verjanda fjögurra þeirra. Saksóknari segir hins vegar engin frekari gögn vera til.

Málið snýst um meinta árás á Alþingi í tengslum við Búsáhaldabyltinguna árið 2008. Ragnar vill meina að Ríkissaksóknari hafi valið úr þau rannsóknargögn sem lögregla aflaði og voru lögð fram í málinu. Hann segir rétt skjólstæðinga sinna ótvíræðan og vitna þar í fjölmörg dómafordæmi.

Settur saksóknari í málinu sagði í morgun að hún vissi ekki hvaða gögn Ragnar væri að tala um, hún hefði sérstaklega látið kanna málið og fleiri gögn væru ekki til.

En hversvegna heldur Ragnar að verið sé að leyna gögnum?

„Fyrir sex mánuðum óskaði ég eftir því að þessi réttur skjólstæðinga minni yrði gerður virkur með því að þeir og ég sem verjandi þeirra fengjum aðgang að öllum rannsóknargögnum, ekki bara þeim sem voru lögð fyrir dóm. Þá var sagt nei, ákæruvaldið byggir eingöngu á þeim gögnum sem það leggur fram. Í þessu svari fólst að það væru til önnur gögn, þess vegna hélt ég kröfunni til streitu og hef haldið henni til streitu til þessa dags. En það er fyrst í dag sem ákæruvaldið segir skyndilega og fyrirvaralaust og lýsir því yfir að það séu ekki til slík gögn," segir Ragnar.

Hann sagðist ekki geta nefnt hvaða gögn hann ætti við, en nefndi þó fyrir dómi upptökur úr þinghúsinu og skýrslutökur af vettvangi. „Ég get ekki sannað eitt né neitt, ég hef aldrei fengið aðgang að rannsóknargögnunum. Þetta mál snýst ekkert um það, það hefur ekkert með sönnun að gera, það snýst um að ganga úr skugga um hver þessi rannsóknargögn eru og ef þau eru engin, þá eru þau bara engin."