Vill að bankarnir einbeiti sér að smærri fyrirtækjum

Viðskiptabankarnir þurfa að fara að einbeita sér meira að smærri fyrirtækjum í stað þess að hafa hugann einungis við stór fyrirtæki, segir Eygló Harðardóttir, þingmaður Framsóknarflokksins.

Eygló hefur óskað eftir því að viðskiptanefnd Alþingis komi sama til að ræða samskipti bankanna við fyrirtækin í landinu. Telur hún að bankarnir hafi hingað til helst bara vilja afskrifa skuldir hjá stórum fyrirtækjum en minni fyrirtæki verið látin sitja á hakanum.

Þá lagði Eygló Harðardóttir fram þingsályktunartillögu í gær um að ríkisstjórninni verði falið að setja á stofn ráðgjafarstofu fyrirtækja. Markmið ráðgjafarstofunnar verði að aðstoða fyrirtæki sem eiga í greiðsluörðugleikum við endurskipulagningu rekstrar eða við að hætta rekstri. Þetta er í fjórða skiptið sem að Eygló leggur þessa tillögu fram en hún hefur hingað til ekki fengist afgreidd.