Sérstakur saksóknari: Vinnan heldur áfram

Magnús Már Guðmundsson skrifar 18. nóvember 2010 20:23

Ólafur Þór Hauksson, sérstakur saksóknari, vill ekki upplýsa hvort yfirheyrslum yfir Lárusi Welding, fyrrverandi forstjóra Glitnis, verði haldið áfram á morgun. Framhaldið verði að koma í ljós.

Yfirheyrslurnar hófust í morgun en þeim lauk skömmu fyrir klukkann átta í kvöld. Lárus vildi ekki tjá sig við fjölmiðlamenn þegar hann yfirgaf húsnæði embættis sérstaks saksóknara.

„Vinnan heldur áfram en ég get ekki gefið upp upplýsingar um framvindu yfirheyrsla í einstökum málum og hvort viðkomandi sé boðaður aftur eða eitthvað slíkt," segir Ólafur Þór sem vill heldur ekki gefa upp hversu margir voru yfirheyrðir í dag.

„Það hefur verið ágætis gangur í vinnunni hjá okkur í dag," segir Ólafur Þór.

Líkt og fram hefur komið fóru umfangsmiklar aðgerðir af hálfu sérstaks saksóknara fram á þriðjudaginn með húsleitum hjá mörgum af fyrrverandi stjórnendum og eigendum bankans.

Tengdar fréttir

Yfirheyrslur í allan dag vegna Glitnisrannsóknar

Yfirheyrslur hafa staðið yfir í allan dag vegna rannsóknar á málefnum tengdum Glitni banka.

18. nóvember 2010 16:03

Sérstakur saksóknari: Húsleitir bera árangur

„Heilt yfir þá er ekki mikið sem hefur upp á vantað í húsleitunum," sagði Ólafur Þór Hauksson, sérstakur saksóknari, í morgunútvarpi Rásar 2 þar sem hann var spurður hvort húsleitir árum eftir ætluð brot skiluðu árangri.

18. nóvember 2010 11:42

Lárus Welding yfirheyrður

Lárus Welding, fyrrverandi bankastjóri Glitnis banka, var kallaður til yfirheyrslu hjá embætti sérstaks saksóknara í morgun. Þar hefur hann setið í allan dag og yfirheyrslur standa enn.

18. nóvember 2010 18:39

Skýrslutökum yfir Lárusi lokið

Yfirheyrslum yfir Lárusi Welding, fyrrverandi forstjóra Glitnis, er lokið. Yfirheyrslurnar hófust í morgun en þeim lauk skömmu fyrir klukann átta í kvöld. Lárus svaraði ekki spurningum fjölmiðlamanna þegar hann kom út frá skrifstofum sérstaks saksóknara ásamt lögmanni sínum.

18. nóvember 2010 19:51