Vill tryggja öryggi á Reykjavíkurflugvelli

Stjórn Slökkviliðs höfuðborgarsvæðisins getur í engu fallist á skert öryggi íbúa, starfsmanna og þeirra sem fara um Reykjavíkurflugvöll. Þetta kemur fram í yfirlýsingu frá stjórninni vegna þeirrar ákvörðunar Flugstoða ohf að láta slökkviliðið hætta með sólarhringsvakt á flugvellinum.

Stjórn SHS hefur því falið slökkviliðsstjóra að hlutast til um það í krafti síns embættis og samkvæmt lögum um brunavarnir að ganga úr skugga um að Flugstoðir tryggi nægilegan viðbúnað á Reykjavíkurflugvelli frá og með 1. mars sem endranær.

„Það er í samræmi við kröfu brunamálastjóra á hendur SHS, sem fram kemur í bréfi Brunamálastofnunar dags. 17. desember 2009. Stjórn SHS mun fylgjast grannt með framvindu mála og gera nauðsynlegar ráðstafanir til þess að tryggja að ákvæðum um viðbúnaðarþjónustu og öryggi verði framfylgt með fullnægjandi hætti á Reykjavíkurflugvelli þrátt fyrir brotthvarf SHS þaðan," segir í yfirlýsingunni.