Styðja gjaldskrárhækkanirnar

Fulltrúar Besta flokksins og Samfylkingarinnar í borgarráði lýstu í dag yfir fullum stuðningi við stjórn Orkuveitu Reykjavíkur í erfiðum verkefnum. Stjórnin Orkuveitunnar samþykkti nýverið að hækka gjaldskrá fyrirtækisins. Fulltrúar VG og Sjálfstæðisflokksins gagnrýndu hækkunina.

„Ákvörðun um gjaldskrárhækkun og hagræðingaraðgerðir væri góðra gjalda verð ef fyrir lægi rökstuðningur og áætlun um næstu skref," segir í bókun VG.

Borgarráðsfulltrúar Sjálfstæðisflokksins mótmæltu harðlega gjaldskrárhækkuninni. „Svo mikil hækkun er hvorki í samræmi við fyrri afstöðu borgarstjórnar um að standa með íbúum, né í samræmi við þær aðstæður sem nú ríkja í íslensku samfélagi. Rétta leiðin og lausnin hefði verið sú að standa við fyrri áætlanir, grípa til róttækrar hagræðingar og endurskoðunar á umfangi fyrirtækisins, en dreifa hækkunum á almenning yfir lengra tímabil."

Þá sögðu fulltrúar meirihlutans aðgerðir stjórnar Orkuveitunnar ýtarlega rökstuddar. „Rétt er að árétta að í stöðunni er ekki valkostur að fresta vandanum eða gera ekki neitt. Fjárhagsstaða Orkuveitunnar verður ekki endurreist með góðum óskum eða fögrum orðum heldur raunverulegum aðgerðum þótt erfiðar séu," segir í bókun Besta flokksins og Samfylkingarinnar.