Fundu marijúana og peninga í íbúð í Vestmannaeyjum

Í gærkvöldi gerði lögreglan í Vestmannaeyjum húsleit í íbúð í fjölbýlishúsi í bænum. Við leit í íbúðinni fundust um 55 grömm af marijúana og nokkur grömm af hassi. Húsráðandinn var handtekinn og færður í fangageymslu þar sem hann gisti síðastliðna nótt. Hann viðurkenndi að eiga efnin og sagði þau til eigin nota og neitaði að efnin væru ætluð til sölu.

Frekari yfirheyrslur yfir manninum verða í dag. Einnig fundust um 170 þúsund krónur í peningum. Maðurinn er þrítugur og hefur áður komið við sögu lögreglunnar vegna fíkniefnamála.