Helga og Bedi fái makleg málagjöld

Meint fórnarlamb svikamyllu Helgu Ingvarsdóttur og Vickrams Bedi segist hafa orðið fyrir barðinu á „margbrotnu ráðabruggi svikahrappa af verstu sort". Þetta kemur fram í yfirlýsingu sem hinn svikni sendi frá sér í gær. Hann hafði fram að því verið þögull og ekki látið fjölmiðla ná í sig.

Fórnarlambið heitir Roger Davidson og er vellauðugur djasspíanisti og erfingi olíurisa. Hann mun hafa greitt parinu um 20 milljónir dollara á sex ára tímabili fyrir að vernda tónlist hans fyrir hondúrískum tölvuvírus og líf hans fyrir valdasjúkum pólskum prestum úr Opus Dei-reglunni.

Parið er grunað um að hafa kokkað upp söguna til að féfletta Davidson en Bedi hefur þvertekið fyrir það og sagt Davidson ofsóknaróðan.

Davidson segir í yfirlýsingu sinni að Bedi og Helga séu ekki hefðbundnir tölvuviðgerðarmenn, heldur hafi þau vingast náið við hann í því skyni að svíkja af honum stórfé. Hann kveðst vera samvinnuþýður við saksóknaraembættið í Westchester í von um að fólkið fái makleg málagjöld og hann endurheimti hugsanlega hluta fjárins. Að lokum biður Davidson um frið á erfiðum tímum.

Helga og Bedi sitja í fangelsi ytra. Réttarhöld í málinu hefjast 2. desember.- sh