Heimsþekkt daðurdrottning á leið til Íslands á nýjan leik

„Tracey kom hingað fyrir sex árum síðan, þegar við gáfum út bókina hennar Súpersex. Og það má eiginlega segja að hún hafi fallið fyrir landi og þjóð," segir Jóhann Páll Valdimarsson, bókaútgefandi hjá Forlaginu. Kynlífs- og sambandssérfræðingurinn Tracey Cox heimsækir Ísland á nýjan leik 10. nóvember til að kynna bókina sína Lostaleikir. „Tracey hefur margoft óskað eftir því að fá að koma hingað aftur. Hún hlaut mjög góðar viðtökur hjá þjóðinni á sínum tíma og kenndi Íslendingum heilmikið um rómantík og nýstárleg rekkjubrögð."

Jóhann sjálfur segist ekki hafa notið persónulegrar leiðsagnar hennar heldur hafi samband þeirra eingöngu verið á faglegum nótunum. „Ástæðan fyrir því að fáum hana til landsins er sá mikli drungi og þungi sem hvílir yfir samfélaginu. Við erum auðvitað að gefa út nýja bók eftir hana en ég held að Íslendingar hafi gott af því að fá ráð hjá henni varðandi rómantík og rekkjubrögð því Tracey fullyrðir í nýju bókinni að hún geti hjálpað til við að senda fólk upp í sjöunda unaðsheiminn. Og hver hefur ekki gott af því á þessum síðustu og verstu?"

Jóhann lumar jafnframt á leyndarmáli sem ekki hefur áður verið dregið fram í dagsljósið en Tracey átti í rómantísku ástarsambandi við íslenskan karlmann meðan á dvöl hennar stóð fyrir sex árum. „Og það var ekkert til að draga úr áhuga hennar á heimsókninni," segir Jóhann og bætir því við að karlpeningurinn hafi gengið með grasið í skónum á eftir Cox, sumir hafi gengið lengra en aðrir og jafnvel þjónar á fínustu veitingastöðum hafi gert hosur sínar grænar fyrir henni.

„Íslenskir karlmenn mega vera stoltir því Tracey er mikill sérfræðingur á sínu sviði og hátt skrifuð," segir Jóhann og bætir því við að hann viti ekki betur en að Tracey sé á lausu um þessar mundir.freyrgigja@frettabladid.is