Enn einn pilturinn stígur fram og segist hafa lent í meintum nauðgara

Tvítugur piltur í Hafnarfirði sem segist hafa verið nauðgað af þrítugum karlmanni vonar að hann verði dæmdur í fangelsi. Hann upplifði mikla skömm og niðurlægingu eftir atvikið en hann hefur leitað til Stígamóta og gengið til sálfræðings vegna þess. Annar piltur hefur kært manninn fyrir nauðgun en alls hafa fjórir piltar sakað manninn um að hafa leitað á sig.

Í vikunni bárust fréttir af því að piltur um tvítugt hefði lagt fram kæru um nauðgaun á hendur manninum sem fæddur er árið 1980 og býr í Hafnarfirði. Hann á að hafa boðið honum í samkvæmi heim til sín en þegar þangað var komið var enginn nema húsráðandi á heimilinu. Áfengi var haft um hönd og sofnaði pilturinn. Hann vaknaði síðan við að maðurinn var að misnota hann.

Pilturinn fór nokkru síðar á neyðarmóttöku fyrir fórnarlömb kynferðislegs ofbeldis á Landspítalanum og kærði í kjölfarið, en lögregla hefur þegar yfirheyrt meintan nauðgara.

Í kjölfar fréttarinnar hafði annar piltur sem fæddur er árið 1990 samband við fréttastofu og sagðist hafa lent í sama manni. Hann ákvað að stíga fram og segja okkur sögu sína, en hann vildi ekki þekkjast og því hefur rödd hans verið breytt. Hann byrjaði að segja okkur frá því þegar hann kynntist manninum, þegar hann var fimmtán sextán ára gamall.

PIlturinn var í fíkniefnum á þessum tíma og segist því hafa leitað í félagsskap mannsins, sem átti auðvelt með að útvega fíkniefni og áfengi. Því sóttist hann í félagsskapinn en fíkniefni og áfengi var alltaf í boði mannsins.

Hann segir að að kvöldið örlagaríka hafi hann verið kominn heim til sín undir morgun, eftir að hafa verið úti að skemmta sér. Hann hafi verið ofurölvi þegar maðurinn hringdi og bauðst til þess að senda eftir honum leigubíl.

„Svo var hann bara einn þarna með gras, áfengi og örlítið af kókaíni. Við reyktum og drukkum og svona skemmtilegheit. Ég var blindfullur reykti gras og það lætur mann fara í visst form af áfengisdauða. Svo átta ég mig á því hvað sé í gangi og þegar ég hef krafta til þess að standa upp geri ég það," segir pilturinn.

Manstu eftir því hvað gerðist inni í svefnherberginu?

„Við getum sagt að þetta fór alla leið, það er það sem ég get sagt."



Hann fer heim til sín og byrjar á því að fara í klukkutímasturtu.

"Ég veit ekki hvað ég var að hugsa það var allt í gangi í hausnum á mér. Það var reiði og niðurlæging og mér leið mjög illa,"

Hægt er að hlusta á viðtalið í heild sinni með þessari frétt.