Undrast stefnubreytingu Jóhönnu

Þorsteinn Pálsson, fyrrverandi forsætisráðherra og formaður Sjálfstæðisflokksins, undrast það sem hann kallar 180 gráðu stefnubreytingu Jóhönnu Sigurðardóttur, forsætisráðherra, kemur kemur að skuldamálum heimilanna og hugmyndunum um niðurfærslu lána.

Þorsteinn og Ragnar Arnalds, fyrrverandi ráðherra og þingmaður Alþýðubandalagsins voru gestir í þætti Sigurjóns M. Egilssonar á Bylgjunni í morgun. „Það er mikill ábyrgðarhluti, svo ég noti nú mjög vægt orðalag, að taka 180 gráðu stefnubreytingu í svona stóra máli á einum degi og stilla sér upp og segja: Nú styð ég almenna niðurfærslu skulda. Fara í einhverjar fundaræfingar koma svo eftir tvær vikur og segja: Nú ég er ég hætt við að styðja almenna niðurfærslu skulda," sagði Þorsteinn og bætti við að Steingrímur J. Sigfússon, fjármálaráðherra, hefði verið mun ábyrgari í yfirlýsingum sínum. „Þetta er ábyrgðarleysi sem ég skil ekki hvernig Alþingi getur sætt sig við."

Ekki hægt að skýla sér á bakvið aðra

Þorsteinn sagði ríkisstjórnina varpa ábyrgð yfir á aðra með því að segja að Íbúðalánasjóður vilji ekki afskrifa lán. „Það er ríkisstjórnin sem ræður yfir Íbúðalánasjóði og það er ríkisstjórnin sem á Landsbankann. Hún getur ekki varið sig með því að segja það eru vondir menn í Íbúðalánasjóði, því það er ríkisstjórnin sem ræður þessum tveimur stofnunum."

Þá sagði Þorsteinn að það væri fullkomlega óábyrgt að ætlast til þess að stjórnendur lífeyrissjóðanna fremji refsiverðan verknað til að bjarga ríkisstjórninni í augnabliks vandræðum. „Ef forstöðumenn lífeyrissjóðanna hefðu samþykkt kröfur forsætisráðherra og dómsmálaráðherra hefði það verið refsiverður verknaður sem þeir hefðu endað í tugthúsinu fyrir að framkvæma."

Stóryrði Þorsteins

Ragnar tók ekki undir með Þorsteini. „Mér finnst þetta vera nokkuð mikil stóryrði hjá Þorsteini," sagði Ragnar og bætti við: „Þetta samráðsferli hefur skýrt málin verulega. Bæði fyrir stjórnmálamönnum og almenning í landinu."

Hægt er að hlusta á viðtalið hér.