Ætla að berjast gegn Urriðafossvirkjun

Unnið er að stofnun nýs framboðslista fyrir sveitarstjórnarkosningar í Flóahreppi. Samhljómur er í hópnum um að klára skipulagsmál hreppsins sem fyrst, og berjast gegn Urriðafossvirkjun.

„Þessi hópur fólks á það sameiginlegt að vilja stuðla að bættu samfélagi í Flóahreppi,“ segir Almar Sigurðsson. Framboðið gæti leitt til þess að virkjunarmál verði stærsta kosningamálið í í vor.

Almar segir hópinn sem standi að nýju framboði ekki tengdan stjórnmálaflokkum eða hagsmunasamtökum. Kosið var milli tveggja ópólitískra lista í síðustu kosningum. Sveitarstjórnin öll hefur stutt áform um virkjun Þjórsár við Urriðafoss, þrátt fyrir að meirihluti kosningabærra manna hafi lýst sig andsnúinn virkjununum.

Almar segir stefnumál nýs framboðs ekki fullmótuð. Á undirbúningsfundi hafi verið mikill áhugi á að ljúka skipulagsmálum sem fyrst, en án þess að Urriðafossvirkjun verði á aðalskipulagi, eins og sitjandi sveitastjórn áformi. Þá sé mikil áhersla á að koma vatnsmálum í hreppnum í lag, en vatnsskortur hefur plagað hreppinn síðustu sumur. - bj