Leikkonur eltar á röndum

Leikkonurnar Jennifer Aniston og Sandra Bullock hafa báðar þurft að hafa afskipti af svokölluðum eltihrellum að undanförnu. Aniston hefur fengið nálgunarbann sett á mann sem telur sig eiga í ástarsambandi við hana.

Maðurinn er 24 ára og var handtekinn í síðustu viku eftir að hafa sést með einangrunarlímband, eggvopn og bréf til Aniston. Hann er sagður hafa leikkonuna á heilanum og vera algjörlega úr takti við raunveruleikann. Hann ók langa leið til að hafa uppi á Aniston í von um að kvænast henni.

Stutt er síðan Sandra Bullock fékk tímabundið nálgunarbann sett á 45 ára gamlan mann sem hefur elt hana á röndum frá árinu 2003. Þá fékk Bullock fyrsta nálgunarbannið sett á hann. Það rann út í fyrra og hefur nú verið endurnýjað. Bullock hefur ekki bara áhyggjur af sjálfri sér heldur einnig Louis Bardo Bullock, sjö mánaða barni sem hún er um þessar mundir að ættleiða.