Fiskur alinn á korni

Til stendur að hefja hlývatnseldi á svokölluðum beitarfiski á Flúðum. Tegundin er afar vinsæll matfiskur víða um heim og er um stærstu fiskeldistegund heims að ræða. Eldið er hluti af uppbyggingu á orkufrekum matvælaiðnaði á svæðinu.

Hrunamannahreppur, Íslensk matorka ehf. og Matís ohf. undir-rituðu í síðustu viku viljayfirlýsingu um uppbyggingu á Flúðum sem meðal annars felur í sér eldi á tílapíu, hvítum matfiski sem kallaður er beitarfiskur hérlendis. Tegundin er orðin stærsta eldis-tegund heims en milljónir tonna eru komnar inn á markaði, og eru Kínverjar þar stærstir.

Stefanía Katrín Karlsdóttir, forsvarsmaður hjá Íslenskri matorku, segir möguleikana mikla. Áhugi sé á að vinna með innlendum ræktendum til að vinna fóður fyrir fiskinn. „Fóðrið sem fyrir er á markaðnum er dýrt og hugsað fyrir laxfiska. Það er til dæmis verið að rækta repju með góðum árangri og í Árnessýslu eru ræktaðar prótínríkar baunir sem gætu nýst okkur.“ Til að fóðra beitarfisk með góðum árangri þarf fóðrið að innihalda ákveðinn hluta af prótíni og kolvetnum, og ýmsar korntegundir henta því til eldisins.

Eldið byggir á nýtingu á volgu vatni sem nóg er af á Flúðum. „Á Flúðum var borað fyrir köldu vatni en það skilar sér volgt vegna þess að berglögin hita það upp. Hitastig vatnsins hentar afar vel til eldis á beitarfiski og það má því segja að volga kaldavatnið á Flúðum hafi vakið áhuga okkar.“

Annað sem skiptir miklu máli er hversu hraðvaxta fiskurinn er. Beitarfiskur vex frá seiði upp í sláturstærð á aðeins sex mánuðum. Til samanburðar tekur 27 mánuði að ala bleikju í sláturstærð og þorsk allt að því fjögur ár. Beitarfiskur keppir víða við þorsk á hvítfiskmörkuðum, svo forskotið dylst engum.

Unnar hafa verið prófanir á bragði, geymslu og fóðrun beitarfisks hjá Matís. Stefanía segir að geymsluþolið sé gott og því henti fiskurinn vel ferskur á Evrópumarkað. „Það er okkar forskot á fiskinn frá Kína því hann kemst ekki ferskur á þann markað nema með miklum tilkostnaði.“

svavar@frettabladid.is