Íslandsbanki vill of mikið fyrir olíufélag

Verðhugmyndir Íslandsbanka á 49 prósenta hlut í Skeljungi þykja í hærri kantinum.

Flestir þeirra sem Fréttablaðið hefur rætt við segja verðmiðhugmyndir bankans hljóða upp á tífaldan EBITDU-hagnað (rekstrarhagnaður fyrir afskriftir og fjármagnsliði). Þeir telja eðlilegra að greiða fjórfaldan EBITDU, eða á fjórða milljarð króna í mesta lagi. Aðrir telja ekki réttlætanlegt að greiða meira en fimm hundruð milljónir króna fyrir hlutinn miðað við slæma skuldastöðu Skeljungs og verð á sambærilegum félögum við núverandi aðstæður. Allt fari þetta eftir eiginfjárstöðu Skeljungs, sem var neikvæð um rúma 1,8 milljarða í lok árs 2008, og hvað kaupendur eru tilbúnir til að setja mikið af nýju fé í reksturinn. Þá er ekki vitað hvernig bankinn kemur til móts við væntanlegan kaupanda.

Fréttablaðið greindi frá því í gær að þrír hafi lagt fram tilboð í Skeljung og eignir olíufélagsins. Það eru núverandi meirihlutaeigendur, Guðmundur Þórðarson, stjórnarformaður Skeljungs, Birgir Þór Bieltvedt og Svanhildur Nanna Vigfúsdóttir, auk félags Guðbjargar Matthíasdóttur og sænska fyrirtækisins Atlantic Tank Storage.

Um mánuður er þar til frestur rennur út til að leggja fram bindandi tilboð í hlut bankans. - jab