Heilbrigðisráðherra setur stjórn Sjúkratrygginga af

Álfheiður Ingadóttir heilbrigðisráðherra hefur sett af stjórn Sjúkratrygginga Íslands og skipað stofnuninni nýja stjórn sem alfarið er skipuð nýju fólki. Fráfarandi stjórnarformaður segir ráðherra tortrygginn í garð stofnunarinnar, en ráðherra segist vilja færa hana nær ráðuneytinu.

„Ég held að meginástæðan sé almenn óánægja [heilbrigðisráðherra] með þessa stofnun, og tortryggni í garð stofnunarinnar, eins og fram kom í vor þegar hún ætlaði að veita forstjóranum áminningu,“ segir Benedikt Jóhannesson, fyrrverandi stjórnarformaður stofnunarinnar.

Spurður hvort þetta geti leitt til þess að forstjóranum verði vikið til hliðar segir Benedikt svo ekki vera. „En ég held að þetta sé ekki gert af neinum hlýhug í garð forstjórans.“

Stjórnin sem nú hefur verið sett af var skipuð snemma árs 2008 til að undirbúa stofnun Sjúkratrygginga Íslands, sem voru stofnaðar formlega haustið 2008. Stjórnarmönnum var tilkynnt það bréflega um mánaðamótin að til stæði að skipa nýja stjórn. Ný stjórn með nýju fólki tók formlega við í gær.

Benedikt segir að ekki hafi verið ágreiningur milli stjórnarinnar og heilbrigðisráðherra. Það hafi þó verið ljóst að ráðherra hafi ekki verið sáttur við allar þeirra hugmyndir. Sjúkratryggingum Íslands var gert að spara verulega í kostnaði við þjónustu sérfræðilækna. Benedikt segir að stjórnin hafi lagt til að kostnaðarþátttaka sjúklinga, annarra en þeirra sem þurfi mikið að nota þjónustuna, yrði aukin. Það hafi ráðherra ekki sætt sig við.

Álfheiður segir að stjórnin hafi verið skipuð til að undirbúa stofnun Sjúkratrygginga Íslands, áður en lög um stofnunina hafi verið sett. „Í þeim lögum eru ákvæði um skipan stjórnar, og það var talið eðlilegt að ganga frá því þannig að skipa stofnuninni stjórn í samræmi við lögin,“ segir Álfheiður.

Dagný Brynjólfsdóttir, nýr stjórnarformaður stofnunarinnar, er deildarstjóri í heilbrigðisráðuneytinu. Álfheiður segir það heppilegt, enda hafi hún með stjórnarskiptunum viljað tengja stofnunina betur við ráðuneytið.

Spurð hvers vegna enginn af þeim sem sæti áttu í undirbúningsstjórninni hafi verið beðinn um að sitja áfram segir Álfheiður að þar hafi verið um „eðlilega endurnýjun“ að ræða. Enginn trúnaðarbrestur eða ágreiningur hafi verið milli hennar og stjórnarinnar.

Upp kom deilumál síðasta vor þar sem Álfheiður ætlaði að áminna Steingrím Ara Arason, forstjóra Sjúkratrygginga Íslands, en hætti við eftir að málið komst í hámæli. Álfheiður þvertekur fyrir að stjórnarskiptin tengist því máli, enda sé því löngu lokið.

brjann@frettabladid.is