Staða mála Íslands óbreytt hjá AGS

„Staðan í málefnum Íslands er óbreytt," sagði Caroline Atkinson, framkvæmdastjóri ytri samskipta Alþjóðagjaldeyrissjóðsins (AGS) á reglubundnum blaðamannafundi sjóðsins í gær, en þeir fara fram hálfsmánaðarlega.

Með þessu brást hún við spurningu um hvort ákveðin hefði verið dagsetning varðandi lok annarrar endurskoðunar efnahagsáætlunar Íslands og AGS. Sendinefnd sjóðsins lauk störfum hvað endurskoðunina varðar eftir fundi hér á landi um miðjan síðasta mánuð. Þess er beðið að stjórn AGS taki endurskoðunina fyrir.

Atkinson áréttaði að málefni Icesave sem slík stæðu ekki í vegi fyrir endurskoðun áætlunarinnar. „En liggja þarf fyrir að fjármögnun áætlunarinnar sé trygg áður en haldið er áfram," bætti hún við. „Um það mál er nú rætt við íslensk stjórnvöld."

Caroline Atkinson svaraði ekki spurningu blaðamanns Reuters um hvort viðræður hefðu átt sér stað milli AGS og þeirra þjóða sem standa að fjármögnun efnahagsáætlunar Íslands. Varðandi hvort möguleiki væri á að ná lendingu í málinu sagði hún að ekkert væri útilokað. - óká