Veikindi starfsmanna Landspítalans minnkuðu

Björn Zoëga, forstjóri Landspítalans, segir að þegar tölur úr rekstri spítalans fyrir árið 2009 séu skoðaðar komi meðal annars í ljós að veikindi starfsmanna minnkuðu á síðasta ári. Hann vonar að það sé merki um að spítalinn sé á réttri leið og þrátt fyrir kreppu, inflúensufaraldur og álag á spítalanum líði starfsmönnum betur. Þetta kemur fram í vikulegum pistli hans sem birtist á vef spítalans.

Í pistlinum segir Björn auk þess að helsta markmið spítalans á næstu árum sé metnaðarfullt. „Við ætlum Landspítala að verða meðal bestu háskólasjúkrahúsa í Norður-Evrópu og vera áfram leiðandi í vísindarannsóknum. Mikilvægt skref var tekið í þessa átt síðastliðinn föstudag þegar langþráður draumur margra varð að veruleika með opnun klínísks rannsóknarseturs á spítalanum. Það er mikilvægur áfangi okkar á þessari vegferð að tryggja að spítali allra landsmanna þróist og verði betri," segir Björn.