Háskólanemum fjölgar

Nemendur á framhalds- og háskólastigi og hafa aldrei verið fleiri hér á landi en haustið 2009. Í framhaldsskóla voru skráðir 29.698 nemendur og 19.008 í háskóla eða samtals 48.706. Skráðum nemendum hefur fjölgað um 3,0% frá fyrra ári sem er lítið eitt meiri fjölgun en árið áður. Þetta kemur fram í tölum sem Hagstofan hefur tekið saman og eru birtar á vef stofnunarinnar.

Fjölgunin er öllu meiri á háskólastigi, eða um 5,5%, á móti 1,5% á framhaldsskólastigi. Fjölgun nemenda skýrist fyrst og fremst af vexti fjarnáms á háskólastigi en nemendum í fjarnámi á framhaldsskólastigi fækkaði frá fyrra ári í fyrsta skipti.

Nemendur grunnskóla, sem jafnframt sækja nám í framhaldsskólum, eru 1.090, sem er 4,0% skráðra nemenda í framhaldsskólum. Grunnskólanemendum í framhaldsskólum hefur fækkað um fjórðung á milli ára.

Konur í meirihluta

Konur eru 56,5% allra skráðra nemenda í framhaldsskólum og háskólum. Þær eru 52,9% skráðra nemenda í framhaldsskólum og 62,2% skráðra nemenda í háskólum.

Flestir nemendur eru skráðir í bóklegt nám. Á framhaldsskólastigi eru 67,2% nemenda skráðir í almennt nám og á háskólastigi eru 98,1% nemenda skráðir í fræðilegt nám.