Eyddu minnst tólf milljónum árið 2005

Þrír borgarfulltrúar, sem eru frambjóðendur Sjálfstæðisflokks í yfirstandandi prófkjöri til borgarstjórnar, skiluðu ekki upplýsingum um styrki vegna prófkjörs fyrir kosningar 2006, til Ríkisendurskoðunar fyrir síðustu áramót. Þeir hafa fallist á að segja blaðinu hver kostnaðurinn var.

Júlíus Vífill Ingvarsson segir styrki til sín hafa verið nálægt fjórum milljónum króna.

„Ég ætla að taka þetta saman, en hef ekki komist í það. Þarna voru engir stórir aðilar, bara hóflegir styrkir,“ segir hann, en ætlar ekki að upplýsa að svo stöddu hverjir styrktu hann helst. Til þess hafi hann ekki fengið samþykki þeirra sem styrktu hann.

Ríkisendurskoðun tekur ekki við þessum upplýsingum lengur, en Júlíus býst við að birta þessar upplýsingar á heimasíðu sinni, þegar þar að kemur.

Þorbjörg Helga Vigfúsdóttir ætlaði að skila Ríkisendurskoðun sínum upplýsingum, en segist hafa haft of mikið að gera í prófkjörsinu, Hún frétti í gær að hún gæti ekki skilað gögnunum inn.

Samkvæmt uppgjöri nam kostnaður hennar fyrir síðasta prófkjör rúmlega 3,6 milljónum. Þar af komu 535.657 krónur frá lögaðilum, 637 þúsund frá einstaklingum, en Þorbjörg reiddi sjálf fram 2,5 milljónir.

í framboði Þorbjargar hafi verið ákveðið 2005 að taka ekki við hærri upphæð frá hverjum og einum en hundrað þúsund krónum: „Það var auðvitað hægt að fá talsvert hærri upphæðir, en ég sóttist ekki eftir því. Við höfðum þessa línu og sama gildir nú.“

Kjartan Magnússon sendi blaðinu í gær uppgjör sitt, og birti á heimasíðu sinni. Þar kemur fram að hann hafi fengið rúmlega 4,4 milljónir í styrki árið 2005. Rúm 732 þúsund frá þrettán einstaklingum, en tæplega 4,7 milljónir frá 47 lögaðilum. Þar af voru 815 þúsund samtals yfir 300 þúsund krónum hvert framlag.

„Mér hafði ekki gefist tími til að ganga frá þessu,“ segir hann, spurður hví hann hafi ekki sent Ríkisendurskoðun gögnin.

Um helstu framlög styrkveitenda, segir Kjartan að mest hafi komið frá Landsbanka, 500 þúsund.

klemens@frettabladid.is