Hótaði að láta „stærstu glæpasamtök heims“ lemja ólétta konu

Hálffertugur karlmaður var dæmdur í sex mánaða óskilorðsbundið fangelsi í dag fyrir að nefbrjóta karlmann og marglemja hann í bifreið. Samkvæmt dómsorði þá hótaði hann einnig manninum en hann sagði að faðir sinn væri hátt settur í „stærstu glæpasamtökum heims" og að lítið mál væri að láta menn á hans vegum vinna barnshafandi konu fórnarlambsins mein.

Það var í febrúar 2009 sem mennirnir hittust í bifreið hins dæmda. Hann bar upp á fórnarlambið að hann ætti í tygjum við konu sína. Ástæðan voru póstsamskipti sem gengu þeirra á milli en þau unnu þá saman.

Um var að ræða grínpósta að sögn fórnarlambsins en svo virðist sem afbrýðissami eiginmaðurinn hafi misskilið grínið með þeim afleiðingum að hann gekk í skrokk á honum í bílnum.

Þá hótaði árásarmaðurinn manninum öllu illu, meðal annars með stöðu föður síns innan „stærstu glæpasamtaka heims".

Ekki er ljóst hvaða samtök árásarmaðurinn átti við, en stærstu glæpasamtök veraldar er Yakuza-mafían í Japan. Talið er að meðlimir japönsku mafíunnar séu tæplega 90 þúsund.

Þó má leiða líkur að því að um Vítisenglana sé að ræða þar sem Yakuza-mafían hefur ekki haslað sér völl hér á landi. Ennþá.

Í dómsorði segir að árás mannsins hafi verið harkaleg og langdregin. Þá hafi hann sýnt einbeittan brotavilja með verkinu. Því sé ekki tilefni til þess að skilorðsbinda refsinguna.