Ráðherra gerir ráð fyrir óbreyttum rekstri Sólheima

„Ég skil ekki þessa nálgun þeirra," segir Guðbjartur Hannesson, félags- og tryggingamálaráðherra, um þá ákvörðun fulltrúaráðs Sólheima að heimila framkvæmdastjórn heimilisins að segja upp þjónustu við fatlaða.

Þá hefur áfallateymi verið skipað til þess að aðstoða íbúa Sólheima við að takast á við breyttar aðstæður.

Guðbjartur segist ekki vita til þess að þjónustan við Sólheima verði með breyttu sniði og bætir hann við að Sólheimar hafi ekki viljað setjast að samningaborðinu með Árborg um málið. Til stendur að færa þjónustu við fatlaða til sveitarfélaganna og það á einnig við um Sólheima.

Guðbjartur segir ekki ástæðu til þess að taka Sólheima sérstaklega út fyrir sviga og halda þeim innan fjárlaga ríkisins.

„Þessi gagnrýni kom flatt upp á okkur," segir Guðbjartur spurður út í blaðamannafundinn með fulltrúaráðinu í dag. Fram kom á fundinum að öllum tilraunum Sólheima til lausnar á vandanum hefði verið hafnað af stjórnvöldum.

„Ég átta mig ekki á því hvaðan þetta upphlaup kemur," segir Guðbjartur, sem segir fulltrúaráðið vera að spá um framtíðina varðandi afkomu Sólheima, enda hafi ekki verið samið um málið. Hann segist ekki búast við neinu öðru en að Sólheimar verði reknir með óbreyttum hætti.