Tólf kíló fokin af kónginum

„Jú, ég er orðinn svolítið lúinn á aðfangadag. Ég reyni yfirleitt að leggja mig með börnunum í klukkutíma en ef það tekst ekki er ég orðinn eilítið þreyttur um kvöldið,“ segir Bubbi Morthens, sem hefur verið á þönum fyrir hver jól síðustu 26 ár.

Í kvöld spilar Bubbi á sínum árlegu Þorláksmessutónleikum í Háskólabíói og í fyrramálið leggur hann af stað austur fyrir fjall og spilar fyrir fangana á Litla-Hrauni ásamt nokkrum vel völdum listamönnum. Bubbi hefur farið á Hraunið síðan 1984 og hefur margoft lýst því yfir að jólin komi ekki fyrr en græna hliðið á Litla-Hrauni lokist fyrir aftan hann. „Þá fer maður heim, fullur þakklætis. Það er því bæði gott fyrir mig og gott fyrir fangana að við hittumst þarna á aðfangadag.“

Bubbi, sem varð 54 ára í ár, segist vera í góðu líkamlegu standi fyrir jólatörnina. „Ég verð að vera í góðu formi til að geta sungið, það er algjört lykilatriði,“ segir Bubbi, sem byrjaði í heljarinnar átaki í september þegar hann var orðinn yfir hundrað kíló. Og fannst sú þyngd vera farin að bitna á röddinni. „Ég á það til að sleppa mér alveg en nú er ég kominn í 89, búinn að missa tólf kíló.“ Hann breytti mataræðinu, tók út brauðmeti og byrjaði að gæða sér á ávaxtadrykkjum, eplum og döðlum. „Og svo vakna ég eldsnemma til að æfa á fastandi maga, sem er síður en svo auðvelt. Brennslan verður hins vegar skilvirkari.“

Bubbi boxar þrisvar í viku og hefur þá hljóðbók í eyrunum, annað hvort Egilssögu eða Góða dátann Svejk, og svo horfir hann á heimildarmyndir á meðan hann hjólar í einn og hálfan tíma. Hann er með góða æfingaaðstöðu heima hjá sér, bílskúr og heilt fjall. „Ég er í sérstökum hitagalla, hettupeysu yfir hann og svo húfu þannig að ég steiki mig alveg.“

Bubbi segist því líkamlega vera fertugur og finnst lítið mál að koma sér aftur í form. „Þetta snýst allt um aga. Ef maður á mínum aldri hreyfir sig ekki þá fitnar hann bara. Maður veit auðvitað aldrei hvenær stóra kallið kemur en ég held að maður ráði helvíti miklu um hvað maður verður gamall.“

freyrgigja@frettabladid.is