Neitar að hafa stungið blóðugum fingri upp í munn lögregluþjóns

Karlmaður, sem hefur verið ákærður fyrir að stinga blóðugum fingri sínum upp í munn lögreglumanns sem var við skyldustörf, neitaði sök við þingfestingu málsins í morgun í Héraðsdómi Reykjavíkur.

Maðurinn hefur að auki verið ákærður fyrir brot gegn sóttvarnarlögum með athæfi sínu. Atvikið átti sér stað í maí á síðasta ári.

Maðurinn er smitaður af lifrabólgu C og á að hafa vitað það þegar hann stakk fingrinum upp í munn lögregluþjónsins. Þar með er honum gefið að sök að hafa stefnt lífi hans og heilsu í hættu enda mögulegt að lögreglumaðurinn smitaðist af sjúkdóminum.

Maðurinn sem um ræðir er búsettur í Svíþjóð og er tæplega fertugur.