Veiðin jafnast á við tugmilljóna markaðsherferð

„Ég myndi segja að hafa fengið þessa lúðu sé á við tugmilljóna markaðsherferð enda hafa viðbrögðin ekki látið á sér standa," segir Haukur Vagnsson, framkvæmdastjóri Víkurbáta á Bolungarvík.

Gunther Hansel, sjötugur þýskur ferðamaður, veiddi í ágúst heimsins stærstu lúðu á sjóstöng fyrir utan Bolungarvík. Atburðurinn vakti mikla athygli og hafa fjölmargir fjölmiðlar greint frá málinu. Síðast í gær fjallaði breska ríkisútvarpið um veiðina.



Fyrsta sætið mikið keppikefli

Hansel var meira en tvær klukkustundir að ná ferlíkinu um borð enda lúðan risastór og um 220 kíló. Um heimsmet mun vera að ræða en fyrra metið var sett undan ströndum Noregs á síðasta ári.

Haukur segir mikilvægt að heimsmetið hafi verið sett á Vestfjörðum. „Það var mikið keppikefla að ná fyrsta sætinu því Noregur hefur verið helsti áfangastaður sjóstangveiðimanna. Þannig að þetta skiptir gríðarlega miklu máli og hafa viðbrögðin ekki látið á sér standa því bókunum hefur rignt inn eftir þetta. Fyrir okkur, Bolungarvík og bara hreinlega Vestfirði og Ísland skiptir þetta miklum máli."

Umfjöllun um málið muni ekki bara nýtast Víkurbátum heldur öðrum fyrirtækjum í sjóstangveiði og ferðaþjónustu í landshlutanum.

Viðtal eftir viðtal

Haukur segir veiði risalúðunnar hafa fengið gríðarlega mikla athygli.

„Það má segja að ég sé búinn að vera meira og minna í viðtölum út um allan heim út af þessu síðan í ágúst. Það hefur verið hringt frá almennum fréttastofum en mest frá fagtímaritum."

„Algjört monster"

Ákveðnar reglur gilda svo hægt sé að tala um heimsmet í þessum fræðum. „Til að mynda má ekki vera nema einn maður sem dregur inn þannig að karlgreyið var algjörlega búinn á því," segir Haukur um Þjóðverjann Hansel sem var þó að vonum alsæll þegar í land var komið. „Lúðan var algjört monster og eina leiðinn var að hífa hana upp með krana."

Haukur segir að næsta sjóstangavertíð hefjist um miðjan apríl og þá verði nóg um að vera hjá fyrirtækinu. Þá segir Haukur að báturinn sem fékk lúðuna sé afar eftirsóttur. Allir vilji fara á veiðar á honum.