N-Kórea: Nýr leiðtogi væntanlega kynntur til sögunnar

Búist er við því að á morgun verði tilkynnt um arftaka Kim Jong-ils á forsetastóli í Norður Kóreu. Verkamannaflokkur Norður Kóreu kemur saman til fundar á morgun og búast menn við því að þar tilkynni leiðtoginn Kim Jong IL að arftakin hans á leiðtogastóli verði enginn annar en sour hans. Mikil leynd hefur hvílt yfir málinu eins og yfir flestu öðru í landinu og lítið er vitað um soninn.

Breska blaðið Guardian hefur eftir nemanda við háskólann í Pyongyang að nemendurnir hafi þó fengið að vita að Kim Jong-Un sé afar gáfaður, hann sé hermaður og mjög ungur. Sömu sögu var að segja árið 1980 þegar fyrsti leiðtogi landsins, Kim Il sung, tilkynnti um arftaka sinn, soninn Kim Jong Il. Það var einmitt gert á flokksfundi verkamannaflokksins það árið, og reyndar hafa slíkir fundir ekki verið haldnir síðan. Það þykir benda til þess að nú standi til að afhjúpa arftakann.

Hið opinbera tilefni fundarins er reyndar 65 ára afmæli flokksins og heyrast sögur þess efnis að blásið verði til stærstu hersýningar í sögu landsins og er þá miklu til jafnað. Hins vegar er óljóst hvenær Kim Jong Un tekur við af föður sínum, sem er 68 ára gamall en við lélega heilsu eftir því sem fregnir herma.