Elton John hótað lífláti

Lögreglan í Atlanta handtók á miðvikudaginn trúarofstækismann að nafni Neal Horsley fyrir meintar hótanir hans gegn söngvaranum Elton John.

Elton John á húsnæði í Atlanta sem hann dvelur stundum í. Það fór í taugarnar á Horsley þegar söngvarinn sagði opinberlega í síðasta mánuði að hann teldi að Jesús hefði verið hommi. Horsley brást við með því að útlista á vefsíðu nokkrar ástæður fyrir því að Elton John þyrfti að láta lífið.

Horsley hefur um árabil birt upplýsingar á Netinu um lækna sem gera fóstureyðingar og birt myndir af konum þegar að þær fara í fóstureyðingar.