Hryðjuverk til Norðurlanda

Þrír menn voru handteknir af norsku öryggislögreglunni í gær grunaðir um skipulagningu hryðjuverka. Mennirnir, sem eru frá Írak, Úsbekistan og Kína, eru taldir tengjast Al Kaída hryðjuverkasamtökunum og að hafa ætlað að framleiða sprengiefni.

Magnus Ranstorp, sænskur sérfræðingur í hryðjuverkastarfsemi, segir við Fréttablaðið að ekki komi á óvart að hryðjuverkamennirnir hafi valið Noreg. Hann segir líklegt að hryðjuverkamenn líti í auknum mæli til landa þar sem þeir telja minna eftirlit með mögulegri hryðjuverkastarfsemi.

Í mati ríkislögreglustjóra á skipulagðri glæpastarfsemi og hættu á hryðjuverkum frá því í mars kemur fram að hættustig á Íslandi hafi talist sambærilegt við það sem er á öðrum Norðurlöndum og að nauðsynlegt sé að yfirvöld haldi vöku sinni. Ennfremur er þar bent á að íslenska lögreglan býr ekki yfir forvirkum rannsóknarheimildum og má því ekki safna upplýsingum um einstaklinga eða lögaðila liggi ekki fyrir rökstuddur grunur um tiltekið afbrot. Þess vegna eru möguleikar lögreglunnar á Íslandi til þess að fyrirbyggja hryðjuverk ekki taldir þeir sömu og á hinum Norðurlöndunum.

Ragna Árnadóttir, dómsmálaráðherra, segir að verið sé að skoða hvort veita eigi lögreglunni forvirkar rannsóknarheimildir. „Við ætlum að skoða þetta og láta réttar-farssérfræðinga vinna tillögur að því hvernig slíkar heimildir myndu líta út og undir hvaða eftirliti þær væru, því það er alveg klárt að ef lögreglan fær slíkar heimildir þarf að vera skýr rammi um það hvenær má nota þær og hvers konar eftirlit er með notkun þeirra," sagði Ragna.

Ragna telur atburðina í Noregi áhyggjuefni en segir að miðað við þau gögn sem liggi fyrir á Íslandi stafi meiri hætta af skipulagðri glæpastarfsemi. Spurð hvort endurmeta eigi hættuna á hryðjuverkastarfsemi á Íslandi í kjölfar atburðanna sagði Ragna of snemmt að segja nokkuð til um það.

- mþl, þeb / sjá síðu 6