Innlent

Stjórn Krossins mun funda um ásakanir

Fimm konur saka Gunnar Þorsteinsson, forstöðumann Krossins, um kynferðisbrot. Hann hafnar ásökunum þeirra með öllu.Fréttablaðið/Anton
Fimm konur saka Gunnar Þorsteinsson, forstöðumann Krossins, um kynferðisbrot. Hann hafnar ásökunum þeirra með öllu.Fréttablaðið/Anton

Stjórn trúfélagsins Krossins mun koma saman um helgina til að ræða ásakanir um kynferðisbrot sem fimm konur hafa borið á Gunnar Þorsteinsson, forstöðumann trúfélagsins.  Þetta staðfestir Björn Ingi Stefánsson, stjórnarmaður og fyrrverandi framkvæmdastjóri Krossins. Hann vill að öðru leyti ekki tjá sig um ásakanirnar á þessu stigi.

Aðrir stjórnarmenn sem Fréttablaðið ræddi við í gær vildu ekki ræða ásakanirnar eða viðbrögð stjórnarinnar við þeim. Gunnar á sjálfur sæti í stjórn Krossins.

Þrjár nafngreindar konur hafa með bréfi til stjórnar Krossins lýst meintum brotum Gunnars. Það hafa tvær konur sem kjósa að koma ekki fram undir nafni einnig gert. Í bréfinu kemur fram að brotin séu öll fyrnd fyrir lögum sökum þess hversu langt er liðið síðan þau voru framin.

Tvær af konunum eru systur fyrrverandi eiginkonu Gunnars, þær Sigríður og Sólveig Guðnadætur. Í yfirlýsingum þeirra, sem fylgdu bréfinu til stjórnar Krossins, lýsa þær meintum brotum Gunnars. Yfirlýsingarnar voru birtar á vefmiðlinum Pressunni í gær.

Sigríður fullyrðir að Gunnar hafi þreifað á sér innan klæða þegar hún hafi verið fjórtán ára gömul, og ítrekað snert sig á óviðeigandi hátt eftir það. Sólveig segir Gunnar hafa káfað á sér þegar hún hafi verið fjórtán ára, og hann hafi haldið áfram að áreita sig fram á fullorðinsár.

Í samtali við Vísi hafnar Gunnar ásökunum Sólveigar alfarið. „Frá 14 ára aldri var ég sem uppalandi hennar í vandræðum vegna lifnaðarhátta hennar og þar komu margir drengir inn í myndina. Ég var miður mín yfir óreglu stúlkunnar og það þekkir móðir hennar og systur. Hún verður ófrísk 16 ára og á svo fimm börn þétt með manninum sínum. Auk þess á hún eitt barn með manni tvö. Orð hennar um 10 ára misnotkun frá 14 ára aldri halda því ekki frekar en nokkur annað sem frá þessum systrum kemur,” segir Gunnar.

„Þegar hún var í sem mesta ruglinu yfirgaf hún börnin sín og treysti mér fyrir dætrum sínum. Sólveig fer með ósannindi og harma ég hefndarþorsta hennar í minn garð,” segir Gunnar.

Ingibjörg Guðnadóttir, fyrrverandi eiginkona Gunnars, segir í yfirlýsingu sem send var DV fyrir hennar hönd að ásakanirnar á hendur Gunnari séu viðbjóðslegar og hún voni að fólk taki ekki mark á þeim. Hún lýsir því þar yfir að hún hafi aldrei séð neitt sem gæti gefið til kynna að Gunnar hafi áreitt ungar stúlkur kynferðislega.

Þriðja konan sem ber Gunnar sökum er Brynja Dröfn Ísfjörð. Hún segir í yfirlýsingu sinni, sem einnig er birt á Pressunni, að Gunnar hafi svívirt sig á brúðkaupsdaginn. Hún segir Gunnar hafa lyft brúðarslörinu og kysst sig á munninn á skrifstofu hans áður en giftingin hafi farið fram.

Eins og fram kom í Fréttablaðinu í gær hefur Gunnar hafnað ásökunum kvennanna með öllu. Hann segist ætla að leita allra úrræða til að hreinsa nafn sitt, enda séu ásakanirnar tilhæfulausar.

brjann@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.