Hægt að vera alræmdur fyrir verri hluti en umhyggju

„Mér fannst það bara býsna gott verð ég að viðurkenna. Mér fannst reyndar konan mín hlæja helst till mikið af mér. Hún hefði mátt stilla því svolítið í hóf," segir Sigmundur Davíð Gunnlaugsson, formaður Framsóknarflokksins, um Áramótaskaupið.

Eins og venja er voru formenn stjórnmálaflokkanna í lykilhlutverki í Skaupinu. „Ég átti ekki von á því að leika svona stórt hlutverk í skaupinu. En líklega verð ég að viðurkenna að sá sem lék mig hafi gert það ágætlega," segir Sigmundur. Hann eigi það til að birtast með þessum hætti í fjölmiðlum. „En þetta var líka áminning um það að taka sig á á nýju ári og missa nokkur kíló því að það er alltaf orðið feitasti náunginn sem leikur mig," segir Sigmundur Davíð.

Margrét Tryggvadóttir, þingmaður Hreyfingarinnar, var líka áberandi í Áramótaskaupinu. Hún var ánægð með niðurstöðuna. „Það er hægt að vera alræmdur fyrir verri hluti en umhyggju," segir Margrét Tryggvadóttir, þingmaður Hreyfingarinnar. Hún segir að allir í sínum hópi hafi haft gaman að Áramótaskaupinu. „En sem gamall ritstjóri hefði ég haft þetta aðeins færri atriði," segir Margrét.