Lúxusjeppi fjármálastjórans settur á sölu

Umdeildur lúxusjeppi sem fjármálastjóri Orkuveitu Reykjavíkur fékk frá fyrirtækinu hefur verið settur á sölu. Fjármálastjórinn ekur nú um á sama bílnum og áður.

Anna Skúladóttir, fjármálastjóri Orkuveitu Reykjavíkur, hefur skilað lúxusjeppa af gerðinni Mercedes-Benz ML 350 sem hún fékk til umráða hjá fyrirtækinu. Orkuveitan keypti jeppann notaðan á 7,1 milljón króna í apríl.

Hjörleifur Kvaran, forstjóri Orkuveitunnar, segir í samtali við fréttastofu að bíllinn hafi verið settur á bílasölu um leið og umfjöllun DV hófst en það var níunda júní.

Hjörlefiur segir að Anna hafi skilað bílnum og óskað eftir endurskoðun á bílafríðindum sínum. Hún ekur nú um á sama bíl frá Orkuveitunnar og hún gerði áður. Það er þrjúlínu BMW. Hjörleifur segir að bílinn sé þriggja eða fjögurra ára gamall.

Fréttablaðið vitnar í dag í bréf sem Anna sendi starfsmönnum Orkuveitunnar. Þar segir að hún harmi umræðuna sem bílakaupin hafa valdið fyrirtækinu.

Sex starfsmenn njóta bílafríðinda hjá Orkuveitunni en verið er að endurskoða þau.