Kolsvartur gleðileikur

Ufsagrýlur, nýtt leikrit eftir Sjón, verður frumsýnt í Hafnarfjarðarleikhúsi í kvöld. „Þetta er svartur gleðileikur, eins og sá sem við Íslendingar erum staddir í núna,“ segir Sjón. „Fjallar um trúnaðarbrestinn á milli þegnanna í litlu landi og hvernig hann fer með fólkið. Kannski ekki síst með þá sem brugðust. Það er verið að velta því fyrir sér hvort lækning sé möguleg.“ Sjón segir að það sé niðurstaða í verkinu og hana muni áhorfendur sjá. „Ég held að áhorfendur muni hugsa um sjálfa sig og aðra á meðan þeir horfa á þetta. Ég held þeir muni taka afstöðu, en það er ekki verið að troða neinu niður um kokið á fólki. Þetta er ekkert predikunarverk. Það er verið að skoða djúpsálarmyndina af því sem hefur gerst. Við notum tæki ævintýrsins og martraðarinnar til að skoða þetta. En fyrst og fremst er þetta kómedía þótt hún sé ansi svört.“ Leikstjóri er Rúnar Guðbrandsson, sem Sjón segir að sé helsti framsækni leikstjórinn í dag. „Hann hefur safnað saman ansi mögnuðum hópi listamanna, meðal annars strákunum í Stilluppsteypu (Helgi Þórsson og Sigtryggur Berg Sigmarsson). Þeir eru í fyrsta skipti að vinna í leikhúsi og hafa búið til mjög flotta hljóðmynd.“ Leikarar í Ufsagrýlum eru sex, þau Aðalbjörg Árnadóttir, Árni Pétur Guðjónsson, Birna Hafstein, Erling Jóhannesson, Hjálmar Hjálmarsson og Orri Huginn Ágústsson. - drg