Matarkarfan hækkar um tíu krónur

Matarverð hefur nánast staðið í stað síðustu tíu mánuði - ef marka má matarkörfu Stöðvar 2. Úr körfunni hækka lýsi og gúrka mest - en sumar vörur hafa lækkað í verði.

Við tíndum til í dag þær vörur sem voru til í Bónus í dag úr matarkörfu Stöðvar 2. Við síðustu verðkönnun , í ágúst 2009, bárum við saman verð frá því í janúar 2008, frá því áður en krónan tók að hrynja. Á því tímabili hafði matarverð hækkað gríðarlega, sumar vörur um yfir 70% og flestar um tugi prósenta.

Í dag reyndist ungnautahakkið á nákvæmlega sama kílóverði og í fyrra, nýmjólkin hafði lækkað um þrjú prósent, AB mjólkin hefur lækkað lítillega en þorskalýsið hefur hækkað um 7%. Þorskbitarnir höfðu hækkað um 19 krónur en innflutta Ariel þvottaefnið lækkað um þrjú prósent - þótt gengið hafi reyndar styrkst um nærri tíu prósent. Gúrkan hefur hækkað um 9% en flatkökurnar eru á sama verði í dag og fyrir 10 mánuðum.

Niðurstaðan er því líklega mörgum gleðiefni á þessum síðustu og verstu - matarkarfa Stöðvar 2 hefur nefnilega sáralítið hækkað síðust tíu mánuði - aðeins um einn léttan tíkall, sem ekki er nú mikils virði í dag.