Piltur reyndi að svíkja út tölvu

Tæplega tvítugur piltur var handtekinn af lögreglunni í verslun á höfuðborgarsvæðinu í gær en þar hafði hann reynt að svíkja út tölvu.

Pilturinn hafði keypt tölvuna á heimasíðu verslunarinnar og gefið upp tilteknar upplýsingar um greiðslukort. Þær vöktu hinsvegar athygli starfsmanna sem höfðu samband við lögreglu í kjölfarið.

Pilturinn kom svo grunlaus í verslunina og hugðist sækja tölvuna en var þá handtekinn. Greiðslukortið sem um ræðir var ekki hans eigið en pilturinn hefur áður reynt að svíkja út vörur með þessum hætti að sögn lögreglunnar.