Ljós á mótum Njarðargötu og Hringbrautar endurbætt

Í fyrramálið, miðvikudaginn 10. febrúar, verður stýribúnaður umferðarljósa á gatnamótum Njarðargötu og Hringbrautar uppfærður. Vegna tengivinnu verða ljósin gerð óvirk tímabundið frá kl. 09:30, en áætlað er að verkið taki um þrjár klukkustundir.

Í tilkynningu frá Reykjavíkurborg segir að meðan ljósin eru óvirk verður frá Njarðargötu eingöngu heimilt að taka hægri beygjur, en akstur þvert yfir Hringbraut verður bannaður, sem og allar vinstribeygjur á gatnamótunum.

„Beinar akstursleiðir um Hringbraut eru opnar, en hámarkshraði takmarkast við 30 km yfir gatnamótin meðan umferðarljós eru óvirk. Beðist er velvirðingar á truflun á umferð og jafnframt er ítrekað við vegfarendur að þeir virði hraðatakmarkanir," segir einnig.

Gatnamótin eru með þeim fjölfarnari í borginni og með breytingum er verið að huga að öryggisþáttum. Ljósastýringu fyrir vinstri beygjurnar af Njarðargötu verður breytt þannig að þær verða ekki samtímis og gildir það sama fyrir gagnstæðar akstursstefnur á Njarðargötu. Snertihnappar fyrir gönguljós verða með titringi og hljóði.