Þungum áhyggjum lýst á fjölmennum fundi á Eskifirði

Þungum áhyggjum var lýst vegna fyrirætlana stjórnvalda um að fyrna núgildandi kvótakerfi, á fjölmennum fundi á Eskifirði í gærkvöldi.

Líkt og á sambærilegum fundi í Vestmannaeyjum nýverið, töldu fundarmenn að rekstrargrundvöllur útvegsfyrirtækja myndi bresta, ef hafin yrði markviss skerðing á kvóta þeirra. Þeim yrði ókleift að afla sér lánsfjár, hvort heldur í formi beinna lána eða aukins hlutafjár.

Seyðisfjarðarkaupstaður, Fjarðabyggð og Útvegsmannafélag Austurlands stóðu að fundinum, en samtök sjómanna tóku ekki þátt í undirbúningi hans.