Tvöfalt hagkerfi á Íslandi - vilja dollara og evrur allan sólarhringinn

Tvöfalt hagkerfi á Íslandi hefur verið staðreynd um nokkra hríð, enda taka veitingahús og verslanir við erlendum gjaldeyri. Það er hins vegar nýmæli að verslanir auglýsi slíkt, en 10-11 verslanirnar segjast taka við dollurum og evrum allan sólarhringinn, alla daga.

Það hefur tíðkast um árabil að veitingamenn taki við erlendum gjaldmiðlum slíkt hefur talist eðlileg þjónusta og kurteisi við fólk, t.d ferðamenn sem ekki hafa haft tök á því að fara í banka til að skipta eða nota ekki greiðslukort. Það er hins vegar sjaldgæfara að sérstaklega sé vakin athygli á því.

En við verslun 10-11 í Lágmúla blasir við stór tilkynning í glugganum á enskri tungu að verslunin taki bæði við dollurum og evrum, allan sólarhringinn, alla daga ársins. En hvers vegna sér verslunin ástæðu til að auglýsa þetta með þessum hætti? „Helstu rökin fyrir því eru að þetta er ein algengasta spurningin hjá okkar viðskiptavinum," segir Sigurður Reynaldsson, framkvæmdastjóri 10-11 verslananna.

Sigurður segir hjá þeim verslunum sem staðsettar séu nálægt hótelum tvöfaldist kúnnahópurinn yfir sumartímann vegna ferðamanna. Útlendingar noti mjög mikið seðla, enda sé kortavæðingin ekki komin jafn langt í mörgum öðrum ríkjum og hér á landi.

Hversu stór hlut tekna ykkar er þá í dollurum og evrum? „Þetta er nú ekki eitthvað sem bjargar þjóðarbúinu. Þetta er á ársgrundvelli einhverjar milljónir, en engu að síður margar afgreiðslur og margar spurningar. Þannig að þetta er gert til einföldunar. Í ákveðnum tilvikum yfir sumartímann, eins og t.d í Austurstræti, eru sjötíu prósent okkar viðskiptavina útlendingar," segir Sigurður.

En hvað verður um alla dollarana og evrurnar? „Þetta fer bara allt í íslenskan banka og þau gera eitthvað sniðugt við þetta."