Áætlun helst ef veður leyfir

Tvær ferðir voru farnar í gærmorgun á áætlun milli Landeyjahafnar og Vestmannaeyja. Eftir það féllu allar ferðir niður vegna veðurs.

Herjólf tók niðri í Landeyjahöfn í gærmorgun. Að sögn Guðmundar Nikulássonar, framkvæmdastjóra Eimskipa innanlands, var það lítilsháttar og vegna hárrar ölduhæðar en vonskuveður var í Landeyjahöfn. Hann segir að dýpi hái ekki áætlun í dag, hún velti á veðri og ölduhæð. Reyna á að halda áætlun og í athugun að sigla til Þorlákshafnar reynist veður vont.

Fjöldi fólks var fastur í Eyjum í nótt og óvíst hvenær það kæmist í land. Ásta Margrét Grétarsdóttir, sem átti bókaða ferð klukkan 15 í gær, var ósátt við skipulag mála í Vestmannaeyjahöfn. „Mér finnst fyrir neðan allar hellur að farþegar sem eiga bókað í ferðir sem falla niður, gangi ekki fyrir í næstu ferð sem farin er.“ Starfsmaður Landeyjahafnar sem Fréttablaðið náði tali af í gærkvöldi sagði ekki fullbókað í Herjólf í dag. Verið væri að hringja í alla farþega gærdagsins og bjóða þeim nýja tíma. - rat