Ræða Össurar hjálpaði

Formaður Ísland-Palestína er kominn til Gaza en hann og starfsmenn stoðtækjaframleiðandans Össurar höfðu beðið í viku eftir að komast inn á svæðið. Hann þakkar íslensku utanríkisþjónustunni að hann komst loks yfir landamærin.

Hópurinn stefndi að því að hanna gervifætur á íbúa Gaza og líta eftir þeim sem áður hafa fengið gervifætur frá Össuri. Sveinn Rúnar Hauksson læknir og formaður Ísland-Palestína komst inn á svæðið í gær og þakkar það íslensku utanríkisþjónustinni, ræðismanni Íslands í Ísrael og utanríkisráðuneytinu.

„Og tel líka að ræða Össurar á Alsherjarþinginu hafi komið því til skila að það væri ekkert liðið að hindra hjálparstarf á þennan hátt," segir Sveinn Rúnar en allur hópurinn er nú kominn með leyfi.

Þegar fréttastofa ræddi við Svein Rúnar í morgun var hann staddur á gervilimastöðinni í Gazaborg þar sem sérfræðingar Össurar hafa veitt aðstoð sína. En þar eru heimamenn að smíða gervilimi á særða meðborgara sína.

„En satt að segja er þetta ekki mikil framleiðni, sex til tíu gervifætur sem þeir smíða á mánuði," segir Sveinn Rúnar.