Hlé gert á leitinni að Andrési

Leitin að Andrési Tómassyni hefur engan árangur borið. Um þrjátíu hópar gengu slóða í gær og vegi í kringum höfuðborgarsvæðið. Hætt var að leita um níu, þegar byrjaði að dimma.

Ólöf S. Baldursdóttir, upplýsingafulltrúi Slysavarnarfélagsins Landsbjargar, segir að hlé hafi verið gert á leitinni. Lögreglan mun taka ákvörðun um hvort að leit hefjist á nýjan leik á morgun. Hún segir að ástæða þess að hlé hafi verið gert á leitinni er sú að engar vísbendingar eru um ferðir Andrésar. „Ekki er vitað hvar á að leita,“ segir hún.

Lögreglan lýsti eftir Andrési á miðvikudaginn en þá hafði ekkert spurst til hans síðan föstudaginn 24. september. Leitað hefur verið að bifreið Andrésar sem er af gerðinni Suzuki Grand Vitara og er ljósbrúnn. Númerið á bílnum er LZ-195.

Þeir sem geta gefið upplýsingar um ferðir Andrésar, eða telja sig hafa sé bíl hans, eru beðnir um að hafa samband við lögregluna í síma 444-1000