Guðrún fékk lyklavöldin

Guðrún Pálsdóttir, nýr bæjarstjóri í Kópavogi, tók við lyklavöldum á skrifstofu bæjarstjóra í morgun, af Gunnsteini Sigurðssyni sem verið hefur bæjarstjóri frá 1. júlí 2009. Gunnsteinn gaf ekki kost á sér í bæjarstjórn í kosningunum í vor og hverfur því til annarra starfa. Hann hefur setið í bæjarstjórn frá árinu 1994 en þá kom hann fyrst inn sem varamaður. Hann hefur setið alls 241 bæjarstjórnarfund.

Ný bæjarstjórn tók við völdum í gær en meirihlutann skipa Samfylking, Vinstri græn, Næst besti flokkurinn og Listi Kópavogsbúa. Sjálfstæðisflokkurinn og Framsóknarflokkurinn sem hafa verið við völd í bænum í 20 ár eru nú komnir í minnihluta.

Guðrún var kjörin nýr bæjarstjóri á fyrsta fundi bæjarstjórnar í gær með sjö atkvæðum. Fjórir sátu hjá.

„Í nýjum málefnasamningi er m.a. kveðið á um að úttekt verði gerð á fjármálum Kópavogs, sett verði á fót Hugmyndahús Kópavogs, leitað verði eftir samvinnu við menntamálaráðuneytið um stofnun nýs framhaldsskóla í Kópavogi og að könnuð verði hagkvæmni þess að Kópavogsbær komi að uppbyggingu hálfkláraðs húsnæðis í bænum og komi á traustum leigumarkaði," segir meðal annars í tilkynningu frá bænum.