Tíu þúsund tonn af loðnu á dagparti

Heimamenn í Vestmannaeyjum höfðu það á orði á miðvikudag að stemningin við höfnina „væri eins og í gamla daga“, þegar sjö loðnuskip komu þar til löndunar á fáeinum klukkutímum. Afli skipanna var áætlaður um tíu þúsund tonn og fór allur í hrognatöku fyrir Japansmarkað.

Gera má því skóna að um sjötíu þúsund tonn af loðnu hafi nú borist að landi og að stórum hluta síðustu daga. Aflaheimildir íslensku skipanna eru tæp 110 þúsund tonn.

Veiðar skipanna hafa þó ekki gengið eins og best verður á kosið. Á miðunum úti af Snæfellsnesi hefur verið bræla og veitt er úr litlum torfum. Aðgengilegra væri að ná aflanum úr stærstu torfunum sem styttra eru gengnar suður með landinu en hrognafylling loðnunnar stjórnar miklu um veiðarnar. Fyrirtækin eru öll sem eitt að horfa til þess að ná sem mestum verðmætum með hrognatöku úr því litla hráefni sem þeim fellur í skaut. - shá