Hreyfingin segist ekkert fundarboð hafa fengið

Þingmenn Hreyfingarinnar segjast ekki hafa verið boðuð á fund forsætisráðherra með stjórnarandstöðunni í morgun. Þetta kemur fram í yfirlýsingu sem þeir hafa sent frá sér. Þar segir að þingmenn Hreyfingarinnar, þau Baldvin Jónsson, Margrét Tryggvadóttir og Þór Saari, hafi fullan vilja til samstarfs um raunverulegar lausnir í landinu og blása þau á yfirlýsingar ríkisstjórnarinnar um áhugaleysi stjórnarandstöðunnar.

„Forsætisráðherra boðaði talsmenn allra stjórnmálasamtaka sem eiga fulltrúa á Alþingi á sinn fund í gær. Á fundinum lagði Þór Saari það til að ráðist yrði í almenna leiðréttingu lána, að verðtrygging yrði afnumin, að lyklafrumvarpið yrði samþykkt, að uppboð sem fram hafa farið á grundvelli ólögmætra krafna verði látin ganga til baka og að ekki yrði hægt að halda kröfum endalaust við eftir gjaldþrot. Þá lagði hann til að nauðungarsölum yrði frestað. Að endingu lagði Þór til að þessi áform yrðu tímasett og þeim hrint í framkvæmd. Í framhaldinu yrðu kosningar tímasettar. Forsvarsmenn ríkisstjórnarinnar sáu ekki ástæðu til að nálgast málin út frá þessu sjónarhorni," segir í yfirlýsingunni.

Þingmenn Hreyfingarinnar vísa í Fréttablaðið í dag og segjast þar hafa lesið að boðað hafi verið til fundar með stjórnarandstöðunni klukkan níu í morgun en þeir ekki fengið neitt boð á þann fund.