Kjalnesingagoði: Þjóðernissinnar misnota sólkrossinn

Jóhönnu Harðardóttur, Kjalnesingagoða Ásatrúarfélagsins, var brugðið þegar hún komst að því að svokallaðir þjóðernissinnar notuðu fána með sólkrossinum í mótmælunum við Alþingishúsið á mánudag.  

„Mér var verulega brugðið þegar ég sá þar fána með ævafornu trúartákni heiðinna manna, sólkrossinum. Því miður setti strax að mér illan grun þar sem ég vissi að enginn úr okkar hópi mundi bera sólkrossinn við pólitískar aðstæður sem þessar,“ segir hún.

Sólkrossinn er ævafornt tákn hins eilífa hringferils náttúrunnar. „Hann er einnig tákn um höfuðáttir og frumkrafta jarðarinnar og hefur ekkert með rasisma og öfgasinnuð hægriöfl að gera,“ segir Jóhanna.

Áhyggjufullir ásatrúarmenn

Daginn eftir mótmælin komst hún að því að fleira ásatrúarfólk væri bæði áhyggjfullt og sárt vegna atviksins. Tveir sólkrossar sáust í mótmælunum. Annar á svörtum grunni, en hinn á rauðum og hvítum og báðir bornir af fólki sem kallar sig þjóðernissinna. Jóhanna telur líklegt að þjóðernissinnarnir séu hluti af „White Pride Worldwide“-hreyfingunni. „Málflutningur hennar er í engu samhengi við anda sólkrossins þótt þeir hafi leyft sér að misnota þetta forna trúartákni,“ segir hún.

Með sólkrossinn um hálsinn

Hún bendir á að fjöldi ásatrúarmanna á Íslandi gangi með sólkrossinn um hálsinn og þyki þeim afar slæmt að vera mögulega taldir kynþáttahatarar vegna notkunar þjóðernissinna á þessu forna tákni.

Hún segir illt til þess að vita að íslenskir þjóðernissinnar skuli leyfa sér að halda áfram þeirri svívirðu sem Hitler hóf, að taka trúarleg heiðin tákn og nota í málflutningi sínum sem á ekkert skylt við merkingu táknanna, sambanber sólkrossinn í þessu tilviki. Það merki sem Hitler gerði hvað þekktast var hakakrossinn en sem kunnugt er var sá kross einnig tengdur sólinni í fornri trú.

Sárara en tárum taki

„Það er sárara en nokkrum tárum taki að sjá sólkrossinn borinn í pólitískum tilgangi af þjóðernissinnum á Íslandi. Ekkert okkar heiðinna manna vill þurfa að snúa bakinu við þessu helga trúartákni aðeins vegna þess að þjóðernissinnar hér á landi hafa kosið að fela sig bak við tákn sem þeir hafa annað hvort misskilið heiftarlega eða hreinlega stolið samviskulaust,“ segir Jóhanna.

Hún leggur mikla áherslu á að uppfræða fólk um raunverulega merkingu sólkrossins. „Við vonumst til þess að öfgasinnum takist ekki að koma illu orði á þetta fagra tákn með misnotkun sinni,“ segir hún.