Samstarfi Íslands við AGS lýkur í ágúst

Stefnt er að því að samstarfi Íslands við Alþjóðagjaldeyrissjóðinn ljúki á réttum tíma í ágúst á næsta ári þrátt fyrir tafir á endurskoðun efnahagsáætlana.

Í gær samþykkti stjórn Alþjóðagjaldeyrissjóðsins í Washington þriðju endurskoðun efnahagsáætlunar fyrir Ísland og fær íslenska ríkið aðgang að 160 milljónum dollara, jafnvirði átján milljarða króna, sem munu fara í að styrkja gjaldeyrisforða Seðlabankans.

Forsvarsmenn sjóðsins segja að samstarfið við Íslendinga hafi gengið vel. Franek Rozwadowski, fulltrúi Alþjóðagjaldeyrissjóðsins hér á landi segir að árangurinn hafi verið tilkomumikill. Verðbólga sé á niðurleið og útlit fyrir að hagvöxtur taki við sér.

Þrátt fyrir miklar tafir á endurskoðun efnahagsáætlana, m.a vegna Icesave-málsins, er samstarfið við sjóðinn á áætlun eftir þessa þriðju endurskoðun. Og er stefnt að því að samstarfinu ljúki á réttum tíma, í ágúst á næsta ári, að sögn Franeks Rozwadowskis. Endurskoðunin sem samþykkt var í gær var þriðja endurskoðunin, en síðan er gert ráð fyrir einni endurskoðun í hverjum ársfjórðungi fram í ágúst 2011.

Ljóst er að sjóðurinn hefur beitt öðrum og nýjum áherslum í samstarfi við Ísland enda ekki daglegt brauð fyrir hann að starfa með þróuðu vestrænu ríki.

Hversu þungbær endurgreiðslan á lánum Alþjóðagjaldeyrissjóðsins verður ræðst af því hvort þeir fjármunir sem fengnir hafa verið að láni verði nýttir, en sem stendur hafa þessir fjármunir verið notaðir að mestu leyti til að styrkja forða Seðlabankans. Að því gefnu að þeim forða verði ekki eytt í inngrip á gjaldeyrismarkaði verður til innistæða fyrir afborgun lánanna þegar að gjalddaga þeirra kemur.

Ríkissjóður þarf nær ekkert að greiða af erlendum lánum fyrr en á næsta ári en þá fellur í gjalddaga eins milljarðs evra skuldabréf sem ríkissjóður gaf út árið 2006 til að styrkja gjaldeyrisforðann.