Hundrað ökumenn fá sekt vegna hraðaksturs

Um hundrað ökumenn, sem keyrðu of hratt á Hafnarfjarðarvegi í gær, voru myndaðir og eiga von á sekt frá lögreglunni. Sá sem hraðast ók var á 107 kílómetra hraða en 9 prósent ökumanna sem óku leiðina á einni klukkustund

keyrðu of hratt.

Fylgst var með ökutækjum sem var ekið Hafnarfjarðarveg í suðurátt, gegnt Akrahverfi í Garðabæ.

„Á umræddum vegarkafla hefur verið nokkuð um umferðaróhöpp að undanförnu, m.a. vegna hraðaksturs, og þannig var vöktun lögreglunnar tilkomin. Orsök óhappa á þessum stað má ennfremur rekja til þess að ekið er of hratt miðað við þéttni umferðar, óvæntar aðstæður skapast svo sem ökutæki bilar á og/eða við veginn, ökumenn þurfa að draga snögglega úr hraða vegna ytri aðstæðna og ökumenn sem aka inn á veginn átta sig ekki á þeim hraða sem kann að vera á þessum vegarkafla,“ segir í tilkynningu frá lögreglunni.