Sveppi í skýrslutöku hjá lögreglu

Lögregla boðaði Sverri Þór Sverrisson, sem er betur þekktur sem Sveppi, til skýrslutöku í dag en á dögunum ók hann bifreið upp Bankastræti og Laugaveg gegn einstefnu. Hann ók auk þess ítrekað upp á gangstétt.

Atvikið var hluti af þætti Audda og Sveppa sem er sendur út á föstudögum. Sveppi játaði brot sitt og má búast við sektum vegna þess. Í tilkynningu sem lögreglan sendir frá sér er bent á þá slysahættu sem í umferðinni er og harmar lögreglan atferlið sem hún segir ábyrgðarlaust.

Í samtali við Vísi segist Sveppi hafa brotið fjögur ákvæði í umferðarlögum. „Maður var ekkert mikið að biðja um leyfi, enda hefði ég ekkert fengið leyfi," segir Sveppi. „Það er gott að þeir eru að vinna vinnuna sína þessir karlar," segir Sveppi.