Gleymdu að stimpla sig en vilja samt atvinnuleysisbætur

Tvö mál bíða afgreiðslu úrskurðarnefndar atvinnuleysistrygginga og vinnumarkaðsaðgerða þar sem einstaklingar krefjast þess að fá greiddar atvinnuleysisbætur án þess að hafa staðfest atvinnuleit sína eins og lög gera ráð fyrir.

Nefndin úrskurðaði fyrr á þessu ári að manni sem láðist að staðfesta atvinnuleit sína í ágúst og september 2009 ætti engu að síður að fá greiddar atvinnuleysisbætur fyrir tímabilið. Vinnumálastofnun neitaði að greiða bæturnar með vísan í að hann hefði ekki fylgt reglum um staðfestingu atvinnuleitar. Maðurinn kærði þá ákvörðun til úrskurðarnefnar um atvinnuleysistryggingar og vinnumarkaðsaðgerðir, sem komst að þeirri niðurstöðu að ekki væri lagastoð til að synja manninum um greiðslu.

Í úrskurði nefndarinnar segir að hvergi í gildandi lögum um atvinnuleysistryggingar sé mælt fyrir um þá skyldu atvinnuleitanda að skrá sig í virkri atvinnuleit með reglubundnu millibili. Þar var bent á að ráðherra gæti sett reglugerð sem gerði slíkt að skyldu. Það hefði hins vegar ekki verið gert þegar mál mannsins kom upp.

Í framhaldi af þessu voru gerðar breytingar á lögum um atvinnuleysistryggingabætur sem tóku gildi 1. janúar 2010.

Sjötta grein nýrra laga hljómar svo:

„Vinnumálastofnun er heimilt að boða þann tryggða til stofnunarinnar með sannanlegum hætti á þeim tíma sem hann fær greiddar atvinnuleysisbætur eða sætir biðtíma eða viðurlögum samkvæmt lögum þessum, meðal annars til að kanna hvort breytingar hafi orðið á högum hans sem kunna að hafa áhrif á rétt hans samkvæmt lögum þessum. Skal hinn tryggði þá vera reiðubúinn að mæta til stofnunarinnar með mjög skömmum fyrirvara."

Vinnumálastofnun lítur svo á að með þessum breytinum hafi verið fest í sessi það fyrirkomulag stofnunarinnar að krefjast þess að fólk staðfesti atvinnuleit sína með reglulegu millibili, eða „stimpli" sig eins og sagt er.

Þrátt fyrir að þessar breytingar hafi átt sér stað hafa nú tveir kært synjun Vinnumálastofnunar á greiðslu atvinnuleysisbóta vegna þess að atvinnuleit var ekki staðfest.

Þær upplýsingar fengust hjá Vinnumálastofnun að litið væri svo á að samkvæmt nýjum lögum hefðu stofnunin fulla heimild til að synja viðkomandi um greiðslu.