Ákært fyrir amfetamínafbrigði sem olli vanda

Ríkissaksóknari hefur ákært tvo karlmenn fyrir stórfellt fíkniefnabrot. Þeim er gefið að sök að hafa staðið að ólögmætum innflutningi á tæpum fjórum kílóum af svokölluðu 4-flúoroamfetamíni frá Hollandi hingað til lands.

Þetta mál, sem kom upp í desember á síðasta ári, vakti mikla athygli því 4-flúoramfetamín, sem er náskylt amfetamíni var ekki á skrá hér á landi yfir ávana- og fíkniefni sem óheimil eru á íslensku forráðasvæði. Manninum sem flutti efnin til landsins var því sleppt úr haldi. Sjálfur bar hann að hann hefði talið sig vera að smygla um það bil einu kílói af lyktarlausu kókaíni.

Maðurinn, sem er á þrítugsaldri, hefur nú verið ákærður fyrir Héraðsdómi Reykjaness fyrir að hafa staðið að ólögmætum innflutningi á rúmum 3,7 kílóum af 4-flúoróamfetamíni, ætluðu til söludreifingar í ágóðaskyni hér á landi. Í ákæru segir að hann hafi tekið við efnunum í Hollandi og flutt hingað til lands með flugi frá Berlín að beiðni hins mannsins sem ákærður er í málinu. Tollverðir fundu efnin falin undir fölskum botni ferðatösku við komu mannsins til Keflavíkurflugvallar. Meintur skipuleggjandi er tæplega þrítugur að aldri.

Við þingfestingu málsins játaði hið meinta burðardýr að hafa flutt inn ofangreint magn af 4-flúoramfetamíni í umrætt sinn í þeirri trú að um hafi verið að ræða kókaín. Hann gerði fyrirvara um að hið innflutta efni væri ólögmætt. Hinn, sem sakaður er um skipulagningu smyglsins neitaði sök. - jss